اذاقـلـبــك خــذا الــهــجــران عــاده

يقول اللي من الفرقا صويبي
وضاق ولا بقا صوتن يجيبي

علام الخافق اللي قد تجرح
يحاتي والحزن عيا يغيبي

حبيبي خافقي والله تكوّى
أوّن وللاسف محدن دريبي

حبيبي والله ان البعد ذله
بلا ماتستمع ذلي ونحيبي

كأني جاهلن يبكي على امه
هلكـْه الجوع ولا حوله حليبي

او اني منطعن بارضن خلاوي
يسيح الدم ولا عندي طبيبي

او اللي ضاع كل ماله وحلاله
لقا حاله عقب عزه غريبي

يقولون الهوى سقم ومذله
انشهد بي جروحن ماتطيبي

جروحن كايده تنتف بعضها
اقاسي حرقها واكتم لهيبي

ولا تلوم الهوى اللي بي تمكن
وعاش بداخلي وقتن عصيبي

لذا ارجوك ياعذب السجايا
تكرم بي وتبقى لي قريبي

لاجل كل المحبه في ضميري
لاجل ماهمني غيرك يغيبي

ولاجل واضح غلاي وضوح شمسك
ولاجل تعرف كثر ماقلت طيبي

ولاجل انك هواي وشف روحي
وغيرك ( ثق تماما ) مايطيبي

اذا تشوف الهوى غلطه كبيره
تراني راضي بضعفي وعيبي

واذا قلبك خذا الهجران عاده
تأكد عادتي انك حبيبي

ورب البيت تبقى بي المحبه
ولو قالوا ترى حاله عجيبي

احبك لو بلغ حبك هبالي
ولو حبيتك لوقت المشيبي

ولو ظليت وحدي في حياتي
رجيتك مسندي !! وغيرك يخيبي

اساهر بالامل ليلي واحاتي
وأوّن ولاحدن مثلك دريبي

بعدها مابقا شيٍّ اقوله
سوى اني انتظر تصبح قريبي

عساك بيوم ترجع واتلطف
وتصبح غايتي وحظي ونصيبي